Proclamatie Prins Joep 1 & Prinses Gina

Ranzel 7 januari 2023

Samen: Veer, Joep Vaessen en Gina Smeets, bie de gratie van de Wuif, Prins en Prinses van d’r Lubosh tot d’r Moasj, van de Koule tot aan gen Beukelskoel, van ’t Ransdalerveld tot Termaar, maken aan uch ’t volgende bekind.

Punt 1:

Joep: Ich Joep Vaessen, bin geboare in 2002 en ’t grootste deil van mien leave opgegreuid op Termaar. Gelukkig woar pap zoe sjlum om mam euver te hoale om in Ranzel carnaval te vieren, woadoor ich in hart en neeren inne richtige Wouf bin gewoare.

Punt 2:

Gina: Ich Gina Smeets, bin in 2003 geboare en getoage in Ranzel, onger aan dees sjtroat op nummer 19. Mich is vasteloavend al van kleins aaf aan in ’t blood gekroape.

Punt 3:

Joep: In mien dagelijks leave sjleutel ich aan auto’s en in miene vrieje tied bin ich waal ins op ’t circuit te vinge. Noe ’t raceseizoen um is, mot v’r mer extra good gaas geave mit de carnaval.

Punt 4:

Gina: Ich bin in ’t dagelijks leave veul te vinge in Eindhoven veur mien studie, Medisch Beeldvormende en Radiotherapeutische Technieken. (Mer wat dat inhilt mot g’r uch mer zelf opzeuke).

Punt 5:

Joep: In 2014 hub ich es jeugdprins ’t prinsesjap moage ervaren. Sinsdien hub ich good opgelit wat de veurgoande prinsen van de Wuif hubbe gedoan en noa ’n paar joar sjtil te hubbe gesjtange, pakke v’r de droad weer op, en hoop ich ze waardig op te kinne volgen.

Punt 6:

Gina: Ouch ich hub al ’n kier moage mitmaken wie ’t is om prinses te zeen bie de jeugdcarnaval. Dit joar hub ich de eer om die ervaring te gebroeke en samen mit miene prins ’t prinsepaar te zeen van de Wuif.

Punt 7:

Joep: Ich hub joare lank mit plezeer samen mit de Giebeleare in d’r optocht mitgeloape. Verder bin ich kort bie de Valsje Loef gewea en hub ich get jöarkes mit de Sjnake van Ubachsberg de optochten umver gebloaze. Dit joar vul ich mien lieske gear aan es prins van de Wuif.

Punt 8:

Gina: Al van kleins af aan hub ich optochten geloape samen mit de Valsje Loef en later bie de Sjnake. Dit joar haupe veer dan ouch dat ozze groep van Ranzel, ZV de Sjneuveleare veur d’r Prinsewagen lup en d’r ’n good fiës van mak.

Punt 9:

Joep: Op moandigoavend repeteer ich mit de drumband, op vriedigoavend hou ich de kinger bezig mit ‘n activiteit bie de jeugdvereniging en op d’r woonsdig en d’r zondig voetbal ich op ‘t 3e van Hellas. De kommende tied wurd dat dus get heller rennen op ‘t veld om al dat beer d’r oet te zjweite.

Punt 10:

Gina: In miene vrieje tied wirk ich bie het Kruidvat in Valkeberg en hou ich mig ouch bezig mit de activiteiten van de jeugd bie de Jeugdvereniging in ’t dörp. Doa neave hub ich joare lank gedanst, dus dat ritmegeveul zit d’r waal in.

Punt 11:

Joep: Dat veur os unne druim oetkump is gein geheim. Mer ver hoove neet meer te druime want ’t is noe werkelijkheid. Doarum hopen v’r ouch dat ekerinne mit deit en dat dit unne onvergeatelijke carnaval wurd. Jonk en oud groet of klein. Gaas d’r op en neet meer sjtop.

Samen: Mit veul sjpass en plezeer op Ranzelse maneer!