Proclamatie Ranzels Viergestirn
Ranzel 14 januari 2023
Vieër, Arwen Eussen, Karlijn Scheijen, Jesse Neven en Lize Dautzenberg, bie de gratie van de Jong Wuifkes, geproclameerd es hoaglöstig Vier-gesjtirn van ’t Wouveriek, dat zich oetsjtrek va d’r Luuëbesj tot Termoasj, va de Koele tot in de Beukelskoel, va de vieëbrök tot aan Opsjuuemer en va Walem tot aan ’t Hieëmelriek, make aan uch ’t volgende bekind:
Punt 1: (Arwen)
Ich, Prins Arwen d’r ieësjte, bin gebaore op 27 juli 2011, woon al mien ganse laeve i Walem en kiek oet euver ’t Wouveriek.
Es ich neet i Walem bin, bin ich te vinge op de boerderie va d’r opa en de oma’s in de Ransdalersjtraot. Ich veul mich dan ouch eine echte Wouf.
Punt 2: (Karlijn)
Ich, Prinses Karlijn, woon mit pap, mam en mie zuske Robien in de Sjpaorsjtraot. Ich handbal i Voelender en hub get mit ut
karnevalsgetal 11. Ut kin namelik gein toeval zeen dat ich gebaore bin op 14 oktober 2011, ich woon op hoesnummer 11 mit de poskode 6311,
en ich 11 jaor oud bin. Ich hub dus ech karnevalsblood!
Punt 3: (Jesse)
Ich bin d’r Jonker Jesse en eine richtige Wouf. Ich bin namelik heim in Ranzel op de Pesjtoar Laevesjtraot gebaore.
Ich voetbal bie VV Hellas, houw de trom bie d’r drumband, fiets gaer in ‘t Heuvelland en bin eine fanatieke vösjer. Doaróm
sjtèl ich vuuer um op esjgoonsdig same get braodhieëringe te vange!
Punt 4: (Lize)
Ich bin Freule Lize en ein ras-ech Wouvinneke. Ich handbal bie Gemini, trommel bie Les Amis en klum tot graote hoagtes bie
Neoliet. Ich woon op ‘t Durpsplein en sjtèl dan ouch vuuer um dit sezoen dao de ieësjte Ranzelse boetegewone boetezitting te
organisere!
Punt 5: (Arwen)
Sinds mien gebaorte bin ich al same mit pap, mam, Mervyn en Melina lid van d’r karnevalsgroep De Hoddelaere. Ich bin hieël
trots dat ich d’r ieësjte Jeugprins va dizze groep maog zeen.
Punt 6: (Karlijn)
Vanaaf ’t begin bin ich lid van De Zukkezeujmere en bin trots um de ieësjte Prinses te zeen wat oet dizze karnevalsgroep kump.
Zie zulle mich begeleide in dees sjaon drie daag!
Punt 7: (Jesse)
Es d’r Jonker Jesse wies ich uch mit miene jonkersjtaf dees vasteloavend d’r waeg.
Es deer mich zuut komme, da pak mich bie d’r erm en da sjoenkele v’r gans Ranzel hielemoal lingelaam!
Punt 8: (Lize)
Es Freule Lize hawt ich uch dit jaor allenej d’r Sjpeegel der Zotheid vuuer!
Es d’r dao in kiekt, zulle al uch zörge verdwijne en plaatsjmaake vuuer vrolijkheid, geluk, sjpas en plezeer!
Punt 9: (Arwen en Karlijn same)
Es Prins en Prinses va de Jong Wuifkes gunt veer dees karnevalsdaag in de polonaise vuuerop en zitte vieër de ganse tent op
d’r kop.
Punt 10: (Jesse en Lize same)
Es Jonker en Freule va ‘t Ranzels Vier-gestirn numme vieër uch mit in ozze raod-geël-greune druim en laote vieër alle
konfettikanonne knalle!
Punt 11: (allemaol)
Vieër numme uch mit in dit waanzinnige jubileumjaor en trèkke mit veer-voudige krach de karnevalskar in ‘t Wouveriek!
Tot sjlot wille vieër alle luuj oet Ranzel, jonk en oud, groat en klein, oetnuuedige same mit os karneval te viere, mit sjpas en
plezeer op de Ranzelse manneer! ALAAF!