Proclamatie Jeugdprins Semmy I en Jeugdprinses Feline I

 

Ranzel, 10 januari 2026

Veer, Semmy Eussen en Feline Maar, bie de gratie van de jong Wuifkes, geproclameerd es Jeugdprins en Jeugdprinses van ’t Wouveriek, dat zich oetsjtrekt van d’r Lübusch tot d’r Moasj, van de Koule tot in d’r Beukelskoel en van Termaar tot in ’t Hiëmelriek make aan uch ’t volgende bekind:

Punt 1:

Ich, Semmy Eussen, bin geboare op 30 Oktober 2014 in Mestreech. Ich bin dus eigenlik eine Ransdaalse Mestreechteneer en ich kin uch vertille dat dees combinatie mich ‘ne echte carnavalist maak. Ich woon al mien ganse leve op de Ransdalerstraat 72 , en hie veul ich mich thoes, ich veul mich dan auch eine echte wouf.

Punt 2:

Feline: Ich, Feline Maar, bin geboare op 22 juni 2014 es inne echte Winkbülle. Ich woon op de Ransdalerstraat nummer 27. Witse waal, die sjoene witte boerderie neave de familie Voasje. Samen mit mien pap, mam en mien zusterke Juliëtte.

Punt 3:

Semmy: Mit mien mam woon ich in de ouw boerderie die vreuger van mien opa en oma woar. Hie woon ich al mien leve lank. Vaak zunt ver auch in Munstergeleen, bie miene pap, mien zusterke Stella en miene broor Ruben. Ouch doa veule ver os thoes en bringe ver geire tied same door.

Punt 4:

Feline: Wie ich nog mèr drie joar waor, zint veer noa Ranzel verhoesd. Dat waor de állerbeste keus die mien pap en mam koste make. De gezèllige sjool en ’t boetesjpele mit mien vrung, dat maakt dat ich mich vanaf daag ein heëël thoes veul hiej in ’t sjoene Wouveriek!

Punt 5:

Semmy: In ut biezunjer bin ich blie dat mien opa en oma, die ummer veur mich kloar sjtoan, getuuge kinne en moage zin van mien prinssjap en dat ich ze hoag vanoet miene prisewagen noa ze moag winke tijdens d’n optoch.

Punt 6:

Feline: In miene vrieje tied sjtaon ich op de tennisbaan of dans ich bie Ritmo in Voelender de voetjes van de vloer. Dèze moves zal ich dizze Vasteloavend zéker good kinne inzetten!

Punt 7:

Semmy: Ich bin keeper bie de jeugd van Hellas en bie sjeut op goal zal ich proberen gein sjteek te loate valle auch al krieg ich ’t noe get drukker es Jeugdprins.

Punt 8:

Feline: Vasteloavend in Ranzel is gewoen de sjoenste tied van ’t joar! Al sinds groep 1 sjtaon ich mit de Wolfpack op de bühne, en auch mit Semmy vier ich ummer Vasteloavend, al die joare. Dit joar hob ich d’r extra, extra veul zin in!

Punt 9:

Semmy: Op der peuterspeelzaal hob ich al es mogge proeve van ’t prinsesjap, dat kin ich mich es der daag van gister herinnere. Ich hob altied al gere prins wille weare, ich bin zo blie dat ’t dan noe eindelijk zowiet is. Bie de wolfpack höbbe Ine, Elsa en Esther mich loate weite wies se de tent oppe kop kins zitte, Feline en ich zullen uch loate zeen wie dat nog beter kint.

Punt 10:

Feline: Ver zeen apetrots dat ósje raod dit joar van top tot teen heëël in ’t nuuj gestöken is. Doa veur is alles uut de kas gehaold om d’r sjoen en sjtraolend bie te loupe. En dat zal neet onopgemerk blieve, want ver zulle trots es inne pauw, lachend en zingend, good zichtbaar mitloupe in al die polonaises!

Punt 11:

Semmy en Feline: Leef luuj van ’t Wouveriek! Of se noe jonk of aod bìs, groat of klein, ’t maak niks oet. Doch mit ós mit en trek dizze vasteloavend volle gaas d’rop oet, mit veul sjpass en plezeer, op ós eige Ranzelse manneer!